Një projektligj i ri i propozuar nga qeveria shqiptare "Për mbrojtjen e konsumatorit" parashikon ashpërsim të ndjeshëm të masave ndëshkuese administrative ndaj bizneseve, duke 6-fishuar gjobën maksimale nga 100 mijë në 600 mijë lekë.

Sipas nismës ligjore, Agjencia Kombëtare për Mbrojtjen e Konsumatorit (AKMK) do të ketë të drejtë të vendosë gjoba nga 300 mijë deri në 600 mijë lekë për shkelje që lidhen me praktikat e padrejta tregtare, publicitetin çorientues, kushtet e padrejta në kontrata apo cenimin e të drejtave të konsumatorëve. Rrethana rënduese do të konsiderohen praktikat agresive të marketingut gjatë vizitave të paplanifikuara në banesa apo ekskursioneve promovuese.

Dokumenti specifikon si shkelje edhe mashtrimet me çmime e përfitime imagjinare, pretendimet e rreme për aftësi shëruese të produkteve, mashtrimet me ofertat "falas", si dhe ndryshimet e njëanshme të kushteve të kontratave dhe normave të interesit të kredive pa pëlqimin e konsumatorit.