Sipas të dhënave të Censit 2023 nga INSTAT dhe krahasimeve me Eurostat, Shqipëria ka regjistruar një shifër prej 43.2% të të rinjve të moshës 25–34 vjeç me arsim të lartë, duke kaluar minimalisht mesataren e Bashkimit Europian prej 43.1%.

Treguesi e rendit Shqipërinë dukshëm më lart se vendet e rajonit si Serbia (34.7%), Maqedonia e Veriut (32.3%) dhe Bosnjë-Hercegovina (26.6%), si dhe përpara shteteve të BE-së si Italia (30.6%) dhe Gjermania (37.9%).

Pavarësisht këtij niveli të lartë shkollimi në letër, tregu vendas i punës dhe niveli i pagave mbeten shumë larg standardeve europiane.

Si pasojë, vendi po përballet me një rrjedhje masive të kapitalit njerëzor, ku sipas të dhënave të BERZH-it rreth 23% e shqiptarëve me arsim të lartë jetojnë e punojnë jashtë vendit, kryesisht në sektorët e shëndetësisë dhe teknologjisë së informacionit.