Ministria e Shëndetësisë dhe Mirëqenies Sociale ka publikuar bilancin zyrtar të të lënduarve gjatë përplasjeve të regjistruara sot në Tiranë, ku numri i personave që kanë kërkuar ndihmë mjekësore ka arritur në 28 vetë.

Sipas të dhënave zyrtare deri në orën 21:00, në Spitalin Universitar të Traumës janë trajtuar 23 persona, mes të cilëve 17 efektivë policie, 1 protestues i mitur, 1 përfaqësuese e medias dhe 4 kalimtarë. Ndërkaq, në Qendrën Spitalore Universitare “Nënë Tereza” kanë marrë ndihmë mjekësore edhe 5 të lënduar të tjerë, nga të cilët 2 efektivë policie dhe 3 protestues.

Autoritetet shëndetësore bënë të ditur se pjesa më e madhe e të lënduarve janë larguar pas marrjes së mjekimit të nevojshëm, ndërsa vetëm dy efektivë policie vijojnë trajtimin në urgjencë dhe përfaqësuesja e medias është shtruar për ekzaminime të mëtejshme me gjendje shëndetësore të stabilizuar.

Nga nisja e protestave më 13 tetor e në vijim, numri i përgjithshëm i personave që kanë marrë trajtim spitalor ka arritur në 14, përfshirë 5 efektivë policie, 4 protestues, 4 kalimtarë dhe 1 gazetare, ndërsa strukturat spitalore vijojnë të jenë në prgatitje të plotë.