Presidenti francez Emmanuel Macron ka dënuar ashpër aktet e dhunës, plaçkitjet dhe trazirat që përfshinë qytetet kryesore të Francës, duke u zotuar se organizatorët dhe pjesëmarrësit e trazirave do të mbajnë përgjegjësi të plotë ligjore.

Në një fjalim televiziv drejtuar kombit, kreu i shtetit francez deklaroi se asgjë nuk i justifikon skenat e shkatërrimit në mbarë vendin, përfshirë zjarrvënien ndaj bashkisë historike të qytetit Limoges, ndërsa bëri thirrje për të bërë dallimin mes protestuesve paqësorë dhe elementëve kryengritës.

"Ata që plaçkitën do të duhet të paguajnë për dëmin, dhe ata që kërkuan të rrëzonin Republikën do të jenë përgjegjës", u shpreh Macron, duke ia faturuar dhunën grupeve të së majtës radikale dhe elementëve me precedentë penalë.

Trazirat violente, të nxitura nga pakënaqësitë mbi koston e jetesës dhe kushtet e studentëve, u shoqëruan me më shumë se 2,000 të arrestuar dhe mbi 600 pjesëtarë të forcave të rendit të plagosur. Ngjarjet kanë thelluar përplasjet politike mes mazhorancës dhe opozitës, në prag të zgjedhjeve presidenciale.