Ministrja e Ekonomisë dhe Inovacionit, Delina Ibrahimaj, ka bërë me dije bilancin e dëmeve materiale të shkaktuara ndaj sektorit financiar dhe pronës private gjatë protestave të ditëve të fundit në kryeqytet dhe në shkallë vendi.

Përmes rrjeteve sociale ministrja nënvizoi se, ndonëse kërkesat e studentëve duhet të dëgjohen me seriozitet, aktet e vandalizmit po cënojnë drejtpërdrejt shërbimet bazë për qytetarët dhe bizneset.

“Në emër të protestës studentore, prej ditësh po dëmtohen biznese, prona dhe veçanërisht degë bankare e bankomate. 38 degë bankare dhe 42 ATM të dëmtuara në të gjithë vendin, duke cenuar shërbimet e përditshme për qytetarët dhe bizneset.

Askush nuk fiton nga kjo dhunë, pasojat do t’i vuajnë të gjithë. Kjo situatë duhet të marrë fund!”, deklaroi Ministrja e Ekonomisë dhe Inovacionit, Delina Ibrahimaj.