Një 30-vjeçar është arrestuar në flagrancë në Dibër, pasi në taksinë që drejtonte janë gjetur dy armë zjarri dhe municion luftarak.

Operacioni policor i koduar “Taksia” u zhvillua nga Komisariati i Policisë Dibër, në bashkëpunim me Seksionin Operacional të DVP Dibër.

Në pranga përfundoi A. T., 30 vjeç, banues në Durrës.

Sipas Policisë, automjeti taksi u kontrollua në vendin e quajtur “Rrethrrotullimi i Bllatës”. Në sediljen e pasme u gjetën një armë zjarri kallashnikov me 13 fishekë, si dhe një pistoletë me një fishek në fole dhe një tjetër në krehër.

Armët dhe municioni u sekuestruan në cilësinë e provës materiale.

Nga veprimet e para hetimore, Policia dyshon se 30-vjeçari i kishte marrë armët në zonën e Tufinës, në Tiranë, dhe synonte t’i transportonte drejt Maqedonisë së Veriut nëpërmjet kufirit të gjelbër.

Hetimet vijojnë për të përcaktuar origjinën dhe destinacionin e armëve, si dhe për të verifikuar nëse në aktivitet janë përfshirë persona të tjerë.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme. /noa.al