Përshkallëzimi i tensioneve dhe dhuna gjatë protestave studentore në kryeqytet ka nxitur reagimin e radhës nga bota e ekranit dhe mediat. Moderatorja dhe autorja e njohur Luana Vjollca ka publikuar një mesazh prekës në rrjetet sociale, ku ka shprehur shqetësimin e saj të thellë për përbaltjen e kauzës rinore me dhunë fizike.

Përmes një postimi në InstaStory, Vjollca u doli në mbrojtje adoleshentëve dhe të miturve të pranishëm në bulevard, ndërsa kërkoi me ngulm reagim, ndjeshmëri dhe përgjegjësi nga institucionet përballë pamjeve të përleshjeve me forcat policore.

"Sot shoh 15-vjeçarë që luftojnë për të ardhmen e tyre, ndërsa më dhemb zemra që kjo luftë shoqërohet me dhunë të vërtetë. Kur lëndohen fëmijët, nuk duhet të ketë justifikime, heshtje apo indiferencë, por përgjegjësi, ndjeshmëri dhe mbrojtje," deklaroi ajo.

Eskalimi i dhunës gjatë ditës së pestë e të gjashtë të revoltës e shtyu moderatoren të bëjë edhe një vetëdeklarim kritik mbi përgjegjësinë e brezit të saj për gjendjen në të cilën ndodhet vendi:

"Ne dështuam si të rritur. Nuk e bëmë dot më mirë. Zoti qoftë me Shqipërinë!"

Reagimi i saj i bashkohet zërave të tjerë të njohur të artit dhe medias, në një kohë kur dhuna e ushtruar në rrugët e Tiranës dhe bilanci me dhjetëra të lënduar kanë ngritur shqetësime të mëdha publike e ndërkombëtare.