Kryeministri Edi Rama ka vijuar akuzat për ato që i quan faktorët e jashtëm dhe brendshëm që, sipas tij, po orkestrojnë trazirat e dhunshme në kryeqytet, duke deklaruar hapur se prapa elementëve të ekstremizuar fshihet "një dorë e huaj" me interesa gjeopolitike kundër Shqipërisë.

Në daljen e sotme, Rama u shpreh se vala e dhunës në Tiranë nuk është e shkëputur nga lëvizjet radikale që po tronditin qytete të tjera evropiane, por në Shqipëri ajo po përdoret për të sabotuar progresin e vendit.

"Ndërkohë që këtu në bulevard është një pjesë shumë e vogël e studentëve të ekstremizuar e të ideologjizuar… kjo flama jonë ka specifikën e vet. Është pjesë e një përpjekjeje të madhe për të bërë atë që i ka ndodhur këtij vendi sa herë ka pasur shansin në histori të ngrejë kokën… Aty brenda është edhe krimi. Është një dorë e huaj," tha Rama.

"Të miturit po përdoren si mburoja njerëzore për të bllokuar Policinë"

Kreu i ekzekutivit përsëriti keqardhjen e tij për rininë dhe studentët e mbledhur në shesh, duke theksuar se kërkesat e tyre për ndryshim janë të natyrshme, por se ata po shfrytëzohen si "pengje" nga krerët e maskuar të trazirave.

Për më tepër, ai denoncoi përdorimin e fëmijëve si mekanizëm për të pamundësuar ndërhyrjen e ligjit:

"Rinia po, është e frustruar, e inatosur, studentët po, duan ndryshim… por me keqardhje të madhe them që kjo rini e këta studentë janë pengje të atij ‘grupit të zjarrit’ në krye, të atyre me maska ku përdoren gjerësisht edhe të miturit. Të miturit përdoren si mburoja për të përparuar e për të marrë terren, duke ua bërë të pamundur policisë që të reagojë me forcë ndaj fëmijëve të vegjël," përfundoi kryeministri.