Pas deklaratës zyrtare të Ambasadës së SHBA-së në Tiranë, reagime me peshë politike kanë ardhur edhe nga Uashingtoni. Kongresmenët amerikanë Joe Wilson dhe Robert Aderholt kanë shprehur shqetësimin e tyre të thellë për përshkallëzimin e trazirave në Shqipëri, duke u bërë thirrje autoriteteve të respektojnë shtetin e së drejtës, liritë demokratike dhe të drejtat e protestuesve paqësorë.

Përmes mesazheve të publikuara në rrjetin social X, dy anëtarët e Kongresit të Shteteve të Bashkuara vunë theksin te rëndësia e llogaridhënies institudionale dhe te roli kyç që të rinjtë duhet të kenë në të ardhmen e vendit.

Kongresmeni Joe Wilson nënvizoi se Shqipëria, si një aleate e NATO-s, duhet të garantojë liritë demokratike dhe i bëri thirrje qeverisë shqiptare të përmbahet nga çdo formë dhune:

"Populli shqiptar meriton liri, sundim të ligjit dhe institucione që mbajnë përgjegjësi për veprimet e tyre. Rinia meriton një zë në të ardhmen e vendit të saj," deklaroi Wilson.

Nga ana e tij, kongresmeni Robert Aderholt kërkoi që të gjitha palët e përfshira të refuzojnë dhunën dhe që institucionet shtetërore të garantojnë mbrojtjen e të drejtave të qytetarëve:

"Populli shqiptar meriton sundimin e ligjit, institucione të përgjegjshme dhe lirinë për të bërë të dëgjohet zëri i tij. Të gjitha palët duhet të refuzojnë dhunën dhe qeveria duhet të respektojë të drejtat e protestuesve paqësorë," u shpreh Aderholt.

Deklaratat e dy ligjvënësve amerikanë rikonfirmojnë vëmendjen e shtuar ndërkombëtare ndaj krizës politike dhe civile në Shqipëri, ndërsa vendi përgatitet për ditën e gjashtë të protestave.