Ambasada e Shteteve të Bashkuara të Amerikës në Tiranë ka reaguar zyrtarisht mbrëmjen e së shtunës pas përshkallëzimit të dhunës dhe përplasjeve të ashpra gjatë ditës së pestë të protestës studentore e popullore në kryeqytet.

Përmes një deklarate të shpërndarë në rrjetet sociale, përfaqësia diplomatike e SHBA-së dënon aktet e dhunshme, ndërsa u bën thirrje të gjitha palëve për vetëpërmbajtje, qetësi dhe respektim të kuadrit ligjor.

"Dhuna, trazirat, lëndimi fizik i të tjerëve dhe shkatërrimi i pronës nuk janë angazhim qytetar. U bëjmë thirrje të gjithë qytetarëve që zgjedhin të demonstrojnë ta ushtrojnë të drejtën e tyre për protestë në mënyrë paqësore, pa akte të dhunshme. U bëjmë thirrje të gjitha palëve për vetëpërmbajtje dhe qetësi," deklaron Ambasada e SHBA-së.

Reagimi diplomatik vjen në një moment mjaft kritik, pasi bilanci i ditës së sotme u mbyll me 59 të lënduar, djegie institucionesh e biznesesh, si dhe mobilizimin e forcave speciale RENEA në mbrojtje të godinës së Kryeministrisë.