Edhe klerikët fetarë i janë bashkuar thirrjeve për reflektim e ulje të tensioneve përballë trazirave të dhunshme që kanë përfshirë kryeqytetin. Arqipeshkvi i Shkodër-Pultit, Imzot Giovanni Peragine, ka publikuar një deklaratë zyrtare ku nënvizon se Shqipëria nuk meriton t’u rikthehet plagëve të rënda të së kaluarës.

Përmes mesazhit të tij, Arqipeshkvi dënon dhunën, por i bën thirrje autoriteteve shtetërore të dëgjojnë shqetësimet e qytetarëve, të hapin rrugën e dialogut dhe të marrin përgjegjësitë e duhura për të garantuar paqen shoqërore.

Më poshtë vijon mesazhi i plotë i Imzot Giovanni Peragine:

Mesazhi i plotë i Arqipeshkvit Giovanni Peragine:

"Protestat e këtyre ditëve dëshmojnë pa dyshim një pakënaqësi të thellë shoqërore, që nuk mund të shpërfillet. Për katër muaj, një numër i konsiderueshëm qytetarësh kanë protestuar në mënyrë paqësore kundër një sistemi që favorizon disa dhe penalizon shumë të tjerë, por zëri i tyre nuk ka gjetur dëgjimin dhe përgjigjet e duhura.

Kjo nuk e justifikon dhunën, e cila duhet dënuar qartë dhe pa asnjë rezervë, por nxjerr në pah përgjegjësinë e autoriteteve për të dëgjuar qytetarët, për të hapur rrugë dialogut dhe për të trajtuar me vendosmëri shkaqet e pakënaqësisë.

Vetëm përmes drejtësisë, barazisë dhe dialogut të sinqertë mund të ndërtohet një shoqëri më e drejtë, ku askush të mos ndihet i përjashtuar dhe ku e mira e përbashkët të mbizotërojë mbi çdo interes personal. Përgjegjësia e autoriteteve nuk matet me deklarata, por me vendime konkrete. Asnjë interes privat nuk mund të vihet mbi të mirën e vendit dhe asnjë pushtet nuk mund ta zëvendësojë detyrimin për t’u dhënë përgjigje qytetarëve.

Kur besimi te institucionet tronditet dhe paqja shoqërore vihet në rrezik, është detyrë e atyre që qeverisin të marrin përgjegjësitë që u takojnë dhe të veprojnë pa vonesë, duke marrë me guxim edhe vendime të vështira, nëse këtë e kërkon e mira e vendit tonë. Shqipëria nuk meriton të përjetojë sërish plagët e rënda të së kaluarës së saj."