Vijojnë trazirat dhe përplasjet e ashpra në Bulevardin "Dëshmorët e Kombit", ku ndërhyrja e forcave të policisë pranë godinës së Piramidës u shoqërua me përdorimin e gazit lotsjellës dhe përshkallëzim të dhunës fizike.

Gjatë shpërndarjes së turmës nga forcat e shumta policore, një i ri është rrëzuar në tokë dhe ka mbetur pa ndjenja për disa minuta pa marrë ndihmën e menjëhershme mjekësore. Ngjarja shkaktoi panik te të pranishmit deri në mbërritjen e një autoambulancë, trupa mjekësore e së cilës ndërhyri për t’i dhënë ndihmën e parë dhe për ta transportuar drejt spitalit.

Aktualisht nuk ka ende një njoftim zyrtar nga autoritetet apo bluzat e bardha mbi gjendjen shëndetësore të të riut të dëmtuar, ndërsa situata në terren mbetet mjaft e tensionuar.