Tiranë, 17 tetor 2026 – Një protestuese është lënduar gjatë tubimit pranë Ministrisë së Arsimit, pasi është goditur në ballë nga një plumb gome, që sipas dëshmisë së saj është lëshuar nga forcat e policisë.

E reja ka treguar se në momentin e incidentit nuk ndodhej në rreshtat e parë të protestës. Ajo u shpreh se goditja mund të kishte sjellë pasoja edhe më të rënda, nëse nuk do të mbante syze.

“ Kjo goditje ishte e rëndë, nuk isha as në rreshtin e parë. Nëse s’do kisha syzet, do isha dëmtuar rëndë në sy. Jam goditur në ballë”, deklaroi protestuesja mes emocioneve.

Pas incidentit, të resë iu dha ndihma e parë mjekësore në terren.

Ngjarja vjen në një situatë të tensionuar gjatë protestës në Tiranë, ku janë raportuar përplasje mes protestuesve dhe forcave të rendit. Ndërkohë, janë ngritur shqetësime lidhur me përdorimin e plumbave të gomës dhe forcës policore gjatë ndërhyrjes për menaxhimin e turmës.