TIRANË — Kryetari i Partisë Demokratike, Sali Berisha, ka reaguar publikisht lidhur me incidentin e ndodhur mbrëmjen e së premtes ku ish-deputeti Klevis Balliu u sulmua nga disa protestues dhe u detyrua të kalonte përmes shtratit të lumit Lana për t’iu drejtuar selisë së PD-së.

Berisha i cilësoi aktet e dhunës si veprime "rrugaçërore" të orkestruara dhe të frymëzuara nga kryeministri Edi Rama, ndërsa u bëri thirrje përfaqësuesve politikë të opozitës që të vijojnë të qëndrojnë pranë rinisë dhe protestuesve në shesh.

Lidhur me sulmin ndaj Balliut dhe përgjegjësinë e pretenduar të qeverisë, Sali Berisha deklaroi:

"Mos harro, ka rryma të ndryshme aty. Ka rryma të cilat janë absolutisht në funksion 24 orë mbi 24 orë me Policinë e Shtetit dhe Edi Ramën. Ju e dëgjuat aktin e rrugaçërisë ndaj deputetit Klevis Balliu, i cili që nga dita e parë e protestës është në protestë me studentët. Çfarë ishte ajo që t’ua them unë ju? Ajo u ndërmor nga një person që para syve të tij u bëri thirrje studentëve të largoheshin nga bulevardi. Thirrje të tillë bën me megafon policia që ta dini ju, kush ka qenë në protestë e ka parasysh. Dhe kur e pa që u kuptua, ndërmori aktin. Ai ishte me mision sigurisht, sepse Edi Rama u hakmor në mënyrë primitive për vezët që hëngri në Parlament. Po i them Edi Ramës se me rrugën e hakmarrjes mund të paguash çmimin më të tmerrshëm. Prandaj, hiq dorë nga hakmarrja! Pra, nuk përfaqëson asgjë nga studentët e vërtetë."

Sipas kreut të PD-së, personat që kryen sulmin ndaj Balliut nuk përfaqësojnë studentët e vërtetë, por kishin mision të vetëm provokimin e situatës në dobi të policisë dhe pushtetit.