TIRANË — Tensionet e ashpra po vijojnë përballë godinës së Ministrisë së Arsimit dhe Sportit, ku pavarësisht përdorimit të plumbave të gomës, ujit me presion dhe gazit lotsjellës nga forcat e rendit, protestuesit refuzojnë të tërhiqen nga sheshi.

Të rinjtë dhe qytetarët e pranishëm po vijojnë qëndresën e tyre në rrugë, duke u rimarrë pozicionet pas ndërhyrjes së policisë.

Nga mesi i turmës dhe tymit të krijuar në shesh po dëgjohen brohoritje masive dhe unisone kundër kreut të qeverisë, ku protestuesit kërkojnë largimin e menjëhershëm të tij.

Gjatë përballjes me kordonin e policisë para Ministrisë së Arsimit, protestuesit thërrasin në kor:

"Edi Rama, o tradhtar, jep dorëheqjen sa më parë!"

Përplasjet mes manifestuesve dhe efektivëve të policisë vijojnë të jenë të pranishme në segmentin rrugor përreth ministrisë.