TIRANË — Studentët dhe gjimnazistët janë grumbulluar sot në ditën e pestë të revoltës masive kundër qeverisë, ku kanë ndërmarrë një tjetër akt simbolik përballë godinës së Ministrisë së Arsimit dhe Sportit.

Protestuesit i kanë vënë flakën një valixheje e përdorur prej tyre si simbol i braktisjes së vendit dhe emigrimit masiv të të rinjve dhe e kanë hedhur atë pranë ministrisë së Arsimit.

Të rinjtë kanë marshuar drejt godinës zyrtare duke thirrur me një zë parullat “Rama, jep dorëheqjen!”. Kjo është dita e pestë e protestave intensive në kryeqytet dhe në disa rrethe të vendit, të cilat gjatë ditëve të fundit janë shoqëruar me përplasje të ashpra mes protestuesve dhe forcave të Policisë së Shtetit.