TIRANË — Deputetja Marjana Koçeku ka shprehur sot mbështetjen e saj të plotë për protestën e studentëve dhe gjimnazistëve, duke e cilësuar atë si një shprehje jetike dhe domosdoshmëri për demokracinë në vend.

Nga protesta, Koçeku hodhi poshtë pretendimet se tubimet po dëmtojnë rrugën e Shqipërisë drejt integrimit në Bashkimin Evropian. Ajo theksoi se problemet reale që cenojnë imazhin e vendit janë korrupsioni dhe mungesa e demokracisë.

Sipas deputetes, edhe vetë Partia Socialiste, si forcë politike në pushtet, ka nevojë për reformim, një dialog më të shëndetshëm dhe më shumë zëra kritikë që të mbështesin të drejtën e rinisë për të protestuar.

"Unë asnjë kritikë nuk e marr personale. E mbështes këtë protestë. Është domosdoshmëri për demokracinë tonë. Po ndodh në atë frymë, pasi është paralajmëruar pas katër muajsh protestash paqësore.

Akuzat se kjo protestë po dëmton imazhin e Shqipërisë, nuk jam dakord. Partitë politike në Shqipëri kanë nevojë për reformim të thellë. PS-ja ka nevojë për dialog të shëndetshëm dhe ka nevojë për zëra kritikë që e mbështesin këtë protestë.

O sot, o kurrë! E dënoj dhunën policore, është kundër të drejtave të njeriut. Aq më tepër kur bëhet fjalë për civilët, veprimet e tyre dhe mungesën e mjeteve të identifikimit. Mbështes këtë protestë të rinisë."

Koçeku dënoi me forcë veprimet e efektivëve civilë të policisë pa mjete identifikimi, duke e cilësuar përdorimin e forcës ndaj protestuesve si shkelje të të drejtave të njeriut.