VLORË — Momente të fortë tensioni janë regjistruar gjatë protestës kundër ndërtimit të Muzeut Hebraik në qytetin e Vlorës, ku protestuesit kanë tentuar të rrëzojnë rrethimin e mbrojtur dhe të futen me forcë brenda hapësirës së objektit.

Përpjekjet e protestuesve për të depërtuar në zonën e projektit janë përballur me rezistencën e forcave të policisë, çka ka çuar në përplasje fizike dhe shtyrje të vazhdueshme mes palëve. Gjatë tensioneve, forcat e rendit kanë tentuar të shoqërojnë një nga protestuesit në komisariat, por ndërhyrja e menjëhershme e turmës nuk e ka lejuar realizimin e shoqërimit.

Gëzim Zilja, një nga organizatorët e protestës kundër këtij projekti, deklaroi se Gjykata e Lushnjës ka vendosur pezullimin e punimeve, mirëpo theksoi se tubimet nuk do të ndalen deri në anulimin e plotë të ndërtimit.

Lidhur me qëndrimin e protestuesve dhe ecurinë e mëtejshme të reagimit, organizatori Gëzim Zilja deklaroi:

"Nuk do të lejojmë ndërtimin e një muzeu hebre në Vlorë."

Protestuesit kanë bërë me dije se do të vijojnë qëndresën dhe tubimet e tyre derisa projekti për muzeun të anulohet tërësisht.