ATHINË — Një murg 58-vjeçar grek është zhdukur prej gati tre muajsh, pasi u nis drejt Turqisë për të vizituar trojet e të parëve të tij dhe për të jetuar si asket.

Familjarët e tij nuk kanë arritur të vendosin asnjë kontakt me të që prej datës 23 korrik, kur ai u largua nga vendbanimi i tij në Neos Mylotopos, në zonën e Giannicës në Greqi.

I zhdukuri është murgu i njohur si Jozef, i lindur me emrin Nikolaos Tsigozis, i cili kishte shprehur dëshirën për të vizituar rajonet historike të Pontit dhe Kapadokisë. Dyshimet e familjes për vendndodhjen e tij janë përqendruar te Stambolli dhe Trabzoni, pasi një biletë udhëtimi e gjetur në emrin e tij konfirmoi se ai ishte nisur me autobus drejt Turqisë.

Një tjetër pistë e hetimit lidhet me Konsullatën Greke në Stamboll, ku më 25 korrik është paraqitur një person që i ngjante murgut dhe ka kërkuar informacion për të udhëtuar drejt rajonit të Pontit, mirëpo identiteti i tij nuk është konfirmuar ende përfundimisht nga autoritetet.

Familjarët kanë njoftuar zyrtarisht organet ligjzbatuese, përfshirë Interpolin, dhe po vijojnë kërkimet me shpresën për të marrë një sinjal jete për 58-vjeçarin.

Lidhur me situatën e rëndë dhe pasigurinë me të cilën po përballen, pjestarët e familjes së murgut deklaruan:

"Duam të dimë… A është gjallë? A është mirë?"