Kryeministri Edi Rama edhe sot u shfaq në mëngjes, ndërsa nuk dihet nëse do të ketë një ditë të pestë protestash, duke deklaruar se e drejta e qytetarëve për të protestuar duhet të garantohet, por duke vendosur një vijë ndarëse mes protestës dhe akteve të dhunshme.

Në një dalje publike nga ambientet e një biznesi të dëmtuar, Rama tha se zëri i studentëve, të rinjve dhe çdo qytetari që zgjedh të protestojë duhet të dëgjohet me respekt.

“Ne i respektojmë studentët, e çmoj forcën e ëndrrave dhe shpresave të tyre si motorin e të ardhmes, si shtysën e të gjithëve ne për të ecur përpara”, u shpreh kryeministri.

Ai shtoi se e drejta për protestë duhet të mbrohet si një e drejtë themelore.

“Zëri i tyre, i të rinjve dhe i çdo qytetari që sot ka nevojë të protestojë duhet dhe do të dëgjohet me respekt. E drejta e tyre për të protestuar duhet dhe do të mbrohet”, tha Rama.

Në të njëjtën kohë, kreu i qeverisë deklaroi se nuk do të tolerohen veprime që, sipas tij, rrezikojnë rendin apo sigurinë.

“S’do të lejoj askënd dhe asgjë që të rrezikojë të ardhmen e këtij vendi”, deklaroi ai.

"Ne i respektojmë studentët, unë e çmoj forcën e ëndrrave dhe shpresave të tyre si motorin e të ardhmes, si shtysën e të gjithëve ne për të ecur me shpejt përpara. Zëri i tyre, zëri i të rinjve dhe i çdo qytetari që sot ka nevojë të protestojë duhet dhe do të dëgjohet me respekt.

E drejta e tyre për të protestuar duhet dhe do të mbrohet si një e drejtë për të cilën ne të gjithë kemi luftuar në kohë të ndryshme, por pikërisht se të rinjtë janë e ardhmja jonë, unë nuk do të lejoj askënd dhe asgjë ta rrezikojë të ardhmen e këtij vendi ku rriten ata dhe çdo fëmijë i Shqipërisë. As për përfitime politike të atyre duarve të paudha që janë rikthyer me tërbimin e djegies e shkatërrimit, as për qëllime të mbrapshta të duarve huaja që janë futur për të na ndalur, por as për ndonjë qëllim tjetër.

Përgjegjësia ime është më e qartë në këto orë të vështira se sa në çdo ditë të mirë; të mbrojë qytetarët tanë, të garantojë drejtësinë dhe ta çojë Shqipërinë përpara, së bashku me këtë shumicë qeverisëse që ka një mandat shumë të qartë: Shqipërinë 2030 në Bashkimin Europian".