Një gjykatë në Meksikë ka vendosur dënimin kapital me nga 158 vjet e 9 muaj burgim për secilin prej tre burrave të shpallur fajtorë për vrasjen e dy vëllezërve australianë dhe mikut të tyre amerikan gjatë një udhëtimi në prill të vitit 2024.

Ngjarja e rëndë ndodhi në një plazh të izoluar në Ensenada, në shtetin e Baja California, ku vëllezërit australianë Jake dhe Callum Robinson, përkatësisht 30 dhe 33 vjeç, së bashku me mikun e tyre amerikan Carter Rhodes, 30 vjeç, kishin udhëtuar për të bërë surf dhe për të bërë kamping. Pas zhdukjes së tyre, trupat e të rinjve u gjetën me plagë plumbash në kokë brenda një pusi të largët, ku autorët i kishin hedhur pas një sulmi grabitjeje me qëllim marrjen e automjetit të tyre.

Gjatë procesit gjyqësor, ku të pandehurit u shpallën fajtorë më 9 tetor, prokurorët theksuan se viktimat u sulmuan në befasi pa pasur asnjë mundësi mbrojtjeje, ndërsa një nga autorët ishte mburrur pas krimit për grabitjen e sendeve personale të të rinjve. Ky krim makabër shkaktoi reagime e zemërim të madh ndërkombëtar, duke rikthyer edhe një herë vëmendjen te niveli i lartë i dhunës dhe siguria e udhëtarëve të huaj në rajonin e Baja California.