Dita e katërt e protestave të rinisë, studentëve dhe gjimnazistëve ka mbyllur siparin me tensione të larta, përplasje me uniformat blu dhe zgjerim të gjeografisë së trazirave në disa nga bashkitë kryesore të Shqipërisë, përfshirë Tiranën, Korçën, Vlorën dhe Lezhën.

Kryeministri Edi Rama reagoi publikisht duke u bërë thirrje qytetarëve që të mos përkulen përballë dhunës dhe duke refuzuar prerazi bërjen e lëshimeve apo dorëheqjen e qeverisë përballë kërkesave të protestuesve. Nga ana tjetër, Policia e Shtetit ka bërë me dije se po heton grupe të caktuara që po nxisin akte ekstremiste dhe dëmtime të pronës, ndërsa Këshilli Ndërfetar i Shqipërisë doli me një apel të përbashkët për paqe, vetëpërmbajtje dhe dialog kombëtar, duke theksuar rëndësinë e dëgjimit të zërit të të rinjve brenda kuadrit ligjor.

Në kryeqytet, seancat gjyqësore për 16 protestuesit e ndaluar gjatë ditës së parë të tubimit nisën nën masa të rrepta sigurie pranë Gjykatës së Tiranës, ku togat e zeza caktuan masa të ndryshme sigurie që nga arresti në burg, arresti në shtëpi dhe detyrimi për t’u paraqitur. Paralelisht, Ministrja e Ekonomisë dhe Inovacionit, Delina Ibrahimaj, inspektoi filiale të dëmtuara të Postës Shqiptare, duke garantuar se shërbimet bazë dhe shpërndarja e pensioneve do të vijojnë pa ndërprerje pavarësisht dëmeve të shkaktuara në objekte.

Trazirat u përshkallëzuan ndjeshëm edhe në rrethe. Në Korçë, pas dëmtimit të Bashkisë, Drejtorisë Arsimore dhe Universitetit "Fan S. Noli", policia arrestoi dy persona dhe procedoi 23 të tjerë, ndërsa u përsëritën përplasjet me djegie koshash e goditje me gurë ndaj forcave të rendit. Në Lezhë, gjimnazistët bojkotuan mësimin, bllokuan aksete rrugore dhe thyen xhamat e shkollës "Hydajet Lezha", kurse në Vlorë u regjistruan përplasje fizike me policinë gjatë tentativës së të rinjve për të prishur murin e projektit të Muzeut Hebraik.