Studenti 22-vjeçar Klevi Metaj, i cili u bë i njohur në rrjetet sociale pas përplasjes me gjashtë punonjës policie gjatë protestës përpara Ministrisë së Arsimit, ka rrëfyer prapaskenat e ngjarjes nga shtrati i Spitalit të Traumës gjatë një interviste për emisionin investigativ "Fiks Fare".

Pavarësisht se Gjykata e Tiranës ka caktuar ndaj tij masën e sigurisë "arrest shtëpie", i riu vijon të mbahet me pranga në duar në ambientet e spitalit, ku ruhet nga dy punonjës të Policisë së Shtetit brenda dhomës. Metaj sqaroi se reagimi i tij ndaj efektivëve erdhi si pasojë e provokimeve të njëpasnjëshme dhe ndjekjes nga forcat e rendit, ku pas përdorimit të gazit lotsjellës dhe goditjeve që pësoi gjatë tentativës për t’u larguar, ai u acarua dhe u kundërpërgjigj me mjete rrethanore.

Gjithashtu, 22-vjeçari bëri me dije se Prokuroria e Tiranës ka ngritur ndaj tij një dosje me një mori akuzash të rënda, përfshirë goditjen për shkak të detyrës, shkatërrimin e pronës, prishjen e qetësisë publike, organizimin e grumbullimeve të paligjshme si dhe mbajtjen e armëve të ftohta, akuza për të cilat efektivët në dhomë i kanë bërë me dije se rrezikon deri në pesë vite burgim. Studenti kritikoi përshkallëzimin e dhunës nga të dyja palët dhe shprehu dyshime mbi prapaskenat politike të protestës, ndërsa vuri në dukje kontrastin e masave të rrepta të sigurisë ndaj tij përkundrejt figurave të akuzuara për korrupsion madhor.