Situata në qendër të kryeqytetit vijon të mbetet kaotike, ku zjarre të reja janë ndezur në zonën pranë Sheshit "Skënderbej" gjatë vijimit të protestave.

Në zonën pas godinës së 15-katëshit, protestuesit i kanë vënë flakën stolave plastikë dhe koshave të mbeturinave, duke krijuar një vatër masive zjarri në mes të rrugës. Re të dendura tymi të zi kanë mbuluar të gjithë perimetrin përreth, duke vështirësuar lëvizjen dhe frymëmarrjen në atë aks.

Menjëherë pas përhapjes së flakëve, në vendngjarje kanë mbërritur mjetet zjarrfikëse, të cilat ndërhynë me shpejtësi për izolimin e zjarrit. Veprimi i zjarrfikësve shmangu përhapjen e mëtejshme të flakëve që rrezikonin të përfshinin një objekt aty pranë si dhe pemët përgjatë sheshit.