Kreu i Partisë Demokratike, Sali Berisha, u ka bërë thirrje qytetarëve, prindërve, rinisë dhe diasporës që të derdhen nesër në rrugët e Tiranës për t’u solidarizuar me protestën e studentëve dhe gjimnazistëve.

Përmes një deklarate publike, Berisha denoncoi me tonë të ashpra sjelljen e strukturave të Policisë së Shtetit përgjatë ditëve të fundit, duke i akuzuar efektivët për dhunë sistemitike, keqtrajtime dhe përdorim të mjeteve të dhunshme ndaj të miturve dhe të rinjve në kryeqytet. Sipas tij, masat e marra nga autoritetet në sheshe e komisariate përfaqësojnë një barbari të paprecedentë që nuk është parë në vend që prej viteve ’90.

Kreu i opozitës i bëri thirrje gjithashtu bisneseve dhe komunitetit që të mbështesin lëvizjen studentore, të cilën e cilësoi si një betejë epike për mbrojtjen e të ardhmes, dinjitetit dhe ëndrrës shqiptare përballë qeverisjes aktuale. Berisha nënvizoi se pjesëmarrja masive e qytetarëve nesër në Tiranë është e një rëndësie të jashtëzakonshme për të mbështetur të rinjtë që po përballen në rrugë me pushtetin.

DEKLARATA E PLOTË:

Mirëmbrëma!

Të dashur qytetarë dhe qytetare, vëllezër dhe motra, zonja dhe zotërinj, u drejtohem sonte para së gjithash si prind, si gjysh, si qytetar, por edhe ish-president e ish-kryeministër i këtij vendi.

Të gjithë ju, prindërve, qytetarëve dhe qytetareve, të gjithë anëtarëve të diasporës tonë kudo që janë, të rinjve dhe të rejave në të katër anët e vendit, nesër është një ditë shumë e rëndësishme, tejet e veçantë. Që nga data 13 gjer sot, në rrugët dhe sheshet e Tiranës, narkobanditë me uniformë janë sjellë në mënyrën më shtazore me akte barbare ndaj studentëve dhe gjimnazistëve të Tiranës.

I kanë keqtrajtuar, torturuar, ndaluar dhe arrestuar me qindra e qindra prej tyre. Kanë mbushur komisariatet me të mitur, me vajza, me qytetarë dhe të moshave më të shtyra. Barbaritë e tyre mbi trupat e rrëzuar të të rinjve dhe studentëve, thyerja e kockave, çarja e kafkave me bombola gazi, me plumba gome, përdorimi i granatave të gazit dhe zhurmuese, përdorimi i tonelatave gaz të skaduar ariu, spraj ariu, shkopinjtë e gomës shoqëruar me shufra hekuri.

Tirana nuk ka njohur një barbari të tillë ndaj të rinjve shqiptarë as në vitet ’90. Nesër gjimnazistët dhe studentët e Tiranës kanë më shumë se kurrë nevojë për mbështetjen e çdo shqiptari në betejën e tyre epike. Në betejën e tyre të pamposhtur.

Nesër, mijëra e mijëra burra, gra, djem dhe vajza, nga mbarë Evropa vërshojnë drejt Tiranës. Ftoj çdo demokrate e demokrat, çdo qytetare e qytetar, çdo prind, nënë, baba, ftoj të gjitha bizneset e vendit të solidarizohemi nesër në Tiranë me studentët, të cilët në këtë betejë epike po mbrojnë më shumë se çdo gjë tjetër të ardhmen e tyre në këtë vend, ëndrrën e tyre shqiptare nga një zjarrvënës, armik i egër i kombit.

Po mbrojnë dinjitetin e qytetarëve shqiptarë. Janë ngritur viganë kundër bandave të drogës në qeveri, narkoshtetit me pasojat e tij shkatërrimtare, kreut të këtij narkoshteti, Padrinos Edi Rama.

Solidariteti dhe mbështetja jonë për studentët është e një rëndësie të jashtëzakonshme. Ora e historisë fton nesër çdo shqiptar në Tiranë.