TIRANË — Ish-ministrja e Mbrojtjes dhe e Jashtme, Olta Xhaçka, është marrë zyrtarisht nën hetim nga Prokuroria e Posaçme (SPAK), në kuadër të hetimeve ku është i përfshirë edhe bashkëshorti i saj, biznesmeni dhe ish-deputeti socialist Artan Gaçi.

SPAK i ka komunikuar zyrtarisht Xhaçkës statusin e personit nën hetim për veprat penale të "korrupsionit" dhe "pastrimit të produkteve të veprës penale". Hetimet e deritanishme kanë nxjerrë në dritë të dhëna që e implikojnë ish-ministren në afera korruptive dhe transaksione të kryera përmes kompanive të bashkëshortit të saj.

Sipas të dhënave, Xhaçka u paraqit në ambientet e SPAK pak minuta pasi nga godina e xhamtë doli bashkëshorti i saj, Artan Gaçi, i cili po ashtu po hetohet për të njëjtat akuza. Gaçi mban statusin e investitorit strategjik për ndërtimin e një resorti turistik mbi një sipërfaqe toke që rezulton e përfituar përmes falsifikimit të dokumenteve.

Çështja që ka vënë në qendër të vëmendjes çiftin lidhet me një sipërfaqe toke në Gjilekë të Himarës, ku ishte parashikuar ndërtimi i resortit turistik "Dreamades Luxury Suites". Në vitin 2021, kompania "AG.TCC" në pronësi të Gaçit përfitoi statusin e investitorit strategjik për projektin me vlerë rreth 5.5 milionë euro, si dhe të drejtën e përdorimit të bregdetit për 30 vjet.

Hetimet e SPAK u mbështetën mbi kallëzimin penal të bërë nga Fredi Beleri, ku përfshiheshin Artan Gaçi, Olta Xhaçka dhe ish-kryebashkiaku i Himarës, Jorgo Goro, lidhur me tjetërsimin e një sipërfaqeje prej 5.512 metrash katrorë në Gjilekë përmes dokumentacionit të falsifikuar.