TIRANË — Ish-sekretarja e Përgjithshme në Ministrinë e Infrastrukturës dhe Energjisë, aktualisht drejtoreshë e KESH, Viola Haxhiademi, është paraqitur këtë të premte në ambientet e Prokurorisë së Posaçme (SPAK).

Haxhiademi u mor në pyetje nga prokurorët e posaçëm për orë me radhë dhe u largua nga institucioni pas përfundimit të seancës pyetëse. Hetimet lidhen me dosjen në ngarkim të ish-zëvendëskryeministres Belinda Balluku, ku ekzistojnë dyshime për abuzime me procedurat e tenderave publikë.

Mësohet se SPAK ka sekuestruar dhe administruar telefonin e Haxhiademit, nga këqyrja e të cilit kanë dalë të dhëna dhe indicie për shkelje të ndryshme. Zyrtarja e lartë konsiderohet si një nga personat kyç në këtë hetim, ndërsa kjo nuk është hera e parë që ajo thirret për të dëshmuar përpara prokurorëve të posaçëm.