Operacioni “Fireworks” në Tiranë, 344 kuti me lëndë piroteknike në një banesë, policia dyshon se do t’u shiteshin pjesëmarrësve në protesta

Policia e Tiranës ka gjurmuar gjatë natës se nga vijnë fishekzjarrët dhe njoftoi sot se kreu operacionin e koduar “Fireworks”, gjatë të cilit është zbuluar një banesë ku ishin magazinuar sasi lëndësh piroteknike të dyshuara si të kontrabanduara.

Sipas njoftimit zyrtar, në pranga ka rënë një 24-vjeçar me inicialet E. R.

Kontrolli është ushtruar në katin e parë të banesës së tij, në rrugën “Jargavani”, ku policia thotë se gjeti dhe sekuestroi 344 kuti me lëndë piroteknike të ndryshme, me një vlerë të përllogaritur rreth 40 mijë euro.

Sipas Policisë, ekziston dyshimi se 24-vjeçari ua furnizonte këto materiale personave të maskuar dhe të dhunshëm që kanë marrë pjesë në protestat e tri ditëve të fundit. Ky mbetet një dyshim i hetuesve dhe po verifikohet në kuadër të procedimit.

Operacioni është zhvilluar nga specialistët e Seksionit për Hetimin e Krimeve Ekonomiko-Financiare, pas informacioneve të marra në rrugë operative se në banesë mbahej një sasi e madhe lëndësh piroteknike për përdorim të kundërligjshëm.

Hetimet vijojnë për të identifikuar persona të tjerë që mund të jenë përfshirë në këtë veprimtari, si edhe për të dokumentuar plotësisht mënyrën e sigurimit dhe destinacionin e lëndëve piroteknike.

Materialet procedurale i janë referuar Prokurorisë së Tiranës për veprime të mëtejshme. /noa.al