Karburantet, pagat, përfitimet sociale dhe rritja e çmimeve nxjerrin protestuesit në rrugë këtë të shtunë në Francë. Autoritetet presin qindra aksione dhe kanë paralajmëruar për rrezik incidentesh në Paris dhe qytete të tjera

Franca po përgatitet për një valë protestash në të gjithë vendin këtë të shtunë, të nxitura nga rritja e kostos së jetesës.

Sipas Franceinfo që citon noa.al, autoritetet presin rreth 300 aksione proteste në zona të ndryshme të vendit. Demonstrata parashikohen në qytetet kryesore, ndërsa grupe protestuesish mund të mblidhen edhe në rrethrrotullime, pika karburanti dhe pranë supermarketeve.

Në mobilizim kanë bërë thirrje edhe disa figura të njohura të lëvizjes së “Jelekëve të Verdhë”, e cila nisi në vitin 2018, mes tyre Jérôme Rodrigues, Priscillia Ludosky dhe Maxime Nicolle.

Në qendër të kërkesave janë ulja e kostos së karburanteve, kundërshtimi i ngrirjes së disa përfitimeve sociale dhe pagave në sektorin publik të parashikuara në projektbuxhet, si edhe masa më të gjera kundër rritjes së shpenzimeve të jetesës.

Sipas Franceinfo, mobilizimit i janë bashkuar edhe sindikata CGT, partia Franca e Panënshtruar dhe Partia Komuniste Franceze.

Autoritetet po përgatiten gjithashtu për mundësinë e incidenteve në Paris dhe qytete të tjera të mëdha.

Ministria e Brendshme ka paralajmëruar për rrezikun e përplasjeve me grupe protestuesish të dhunshëm, ndërsa në kryeqytet janë vendosur kufizime të pjesshme për disa itinerare të propozuara të demonstratave.

Në Paris, autoritetet kanë propozuar rrugë alternative për dy protesta të planifikuara, duke përmendur shqetësime për rendin publik dhe rrezikun e dhunës.