Një tërmet me magnitudë 7 ka goditur gadishullin Kamçatka në Rusi. Lëkundja u regjistrua në një thellësi të madhe dhe deri tani nuk raportohen viktima apo dëme, ndërsa nuk pritet cunami

Një tërmet i fuqishëm me magnitudë 7 ka goditur këtë të premte rajonin e gadishullit Kamçatka, në lindjen e largët të Rusisë.

Sipas Qendrës Sizmologjike Euro-Mesdhetare, EMSC, lëkundja kishte një thellësi prej rreth 140 kilometrash. Reuters konfirmon se tërmeti u regjistrua sot më 16 tetor në Kamçatka.

Sipas të dhënave të USGS të cituara në raportimet e para, tërmeti ndodhi rreth orës 15:35 me orën lokale, afërsisht 76 kilometra në verilindje të Ozernovskiy, pranë skajit jugor të gadishullit, me një thellësi të llogaritur në rreth 143 kilometra.

Deri tani nuk ka të dhëna për viktima apo dëme materiale.

Sistemi amerikan i paralajmërimit për cunami bëri të ditur se nuk pritet cunami, duke marrë parasysh edhe thellësinë e konsiderueshme të tërmetit.

Kamçatka ndodhet në një prej zonave më aktive sizmike të botës, pjesë e të ashtuquajturës “Unaza e Zjarrit” të Paqësorit, ku aktiviteti sizmik është i shpeshtë.