Cikli i ndeshjeve të Abissnet Superiores do të vijojë këtë fundjavë me sfidat e javës së 7-të, të cilat do të shtrihen në një kalendar prej tri ditësh, nga e premtja deri të diela, duke rezervuar përballje të rëndësishme si për zonën e sipërme të renditjes ashtu edhe për mbijetesën.

Java e re do të hapet mbrëmjen e kësaj të premteje, në orën 18:30, me duelin mes Dinamos dhe Teutës, i cili do të zhvillohet në stadiumin "Elbasan Arena". Të dyja skuadrat kërkojnë konfirmimin e ambicieve të tyre në këtë edicion të kampionatit.

Të shtunën, vëmendja do të zhvendoset te dy ndeshje të tjera. Në orën 13:30, Tirana do të presë Laçin në stadiumin e Vorës, ndërsa në orën 16:00, Skënderbeu do të përballet në Korçë me AF Elbasanin, në një takim ku pikët kanë vlerë të madhe për ecurinë e të dy ekipeve.

Përballjet do të vijojnë edhe të dielën. Vora do të presë Partizanin në stadiumin e saj në orën 13:30, ku të kuqtë kërkojnë kthesën pas rezultateve jo të dëshiruara në javët e kaluara, ndërsa vendasit do të synojnë të përfitojnë nga fusha e tyre. Java e shtatë do të mbyllet me supersfidën mes Egnatias dhe Vllaznisë, e programuar për në orën 18:30 në "Arena Egnatia", një duel i fortë mes rrogozhinasve që synojnë kreun dhe shkodranëve që kërkojnë rezultatin pozitiv.