Protesta e studentëve dhe e gjimnazistëve ka hyrë në ditën e saj të tretë duke u përshkallëzuar me përplasje të dhunshme, përdorim të gazit lotsjellës dhe shtrirje të trazirave në disa qytete kryesore të vendit. Situata e rënduar e sigurisë ka detyruar anulimin e seancës plenare të Kuvendit të planifikuar për mëngjesin e sotëm, ndërsa godina parlamentare u rrethua nga forca të shumta policie.

Në kryeqytet, protestuesit u grumbulluan pranë Ministrisë së Arsimit dhe Kuvendit, ndërsa në Rrugën e Durrësit ndërhyrja e policisë me gaz lotsjellës detyroi të rinjtë të tërhiqen drejt sheshit "Skënderbej". Bojkoti i mësimit u pasua nga nxënësit e gjimnazit "Petro Nini Luarasi" dhe shkollave në Kamëz. Vala e revoltës u shtri edhe në Korçë, ku u bllokua bulevardi kryesor dhe u sulmua me sende të forta e kapsolla Drejtoria Arsimore dhe Bashkia, si dhe në Shkodër, ku studentët e Fakultetit të Gjuhëve të Huaja bojkotuan mësimin në shenjë solidariteti.

Sipas të dhënave zyrtare nga Ministria e Shëndetësisë, nga përplasjet e ditës së djeshme kanë marrë mjekim 89 persona, mes të cilëve 61 efektivë policie dhe 18 protestues në Spitalin Universitar të Traumës, si dhe 10 pacientë në QSUT. Në Spitalin e Traumës vazhdojnë të marrin trajtim mjekësor katër policë dhe dy protestues.

Nga ambientet e dëmtuara të Kolegjit të Europës, Kryeministri Edi Rama reagoi për herë të parë duke akuzuar opozitën se po përdor aktet e dhunës për të penguar rrugëtimin europian të vendit, ndërsa u shpreh i hapur për dialog me studentët dhe paralajmëroi përgjegjësi ligjore për dëmtuesit e pronës. Në përgjigje, Grupi Parlamentar i Partisë Demokratike kërkoi dorëheqjen e menjëhershme të qeverisë, krijimin e një kabineti kujdestar, shpërndarjen e parlamentit dhe zhvillimin e zgjedhjeve të parakohshme.

Reagime ka patur edhe nga komuniteti ndërkombëtar, ku Delegacioni i Bashkimit Europian në Shqipëri dënoi përshkallëzimin e dhunës dhe bëri thirrje për dialog konstruktiv. Ndërkohë, për shkak të situatës së pasigurt në kryeqytet, UEFA vendosi zhvendosjen e ndeshjes së Conference League mes Egnatias dhe Midtjylland nga Tirana drejt stadiumit "Elbasan Arena".