Ish-drejtori i Përgjithshëm i Policisë së Shtetit, Gledis Nano, i ftuar në emisionin "Të Paekspozuarit" në Vizion Plus, ka analizuar ndërhyrjen e forcave të rendit gjatë protestave të ditëve të fundit, duke vënë në dukje mungesën e profesionalizmit dhe shkeljen e protokolleve zyrtare.

Sipas Nanos, ndonëse menaxhimi i turmave kërkon përgatitje të lartë, imazhet e shfaqura në terren tregojnë një polici të çakorduar dhe jo mirë të organizuar.

Pikat kryesore nga diskutimi në studio: Shkelja e protokollit nga efektivët: Nano u shpreh kritik ndaj sjelljes së disa punonjësve të policisë, duke theksuar se është e papranueshme që efektivët të ndjekin njerëzit me shkop gome në dorë. Ai kujtoi se Policia e Shtetit ka një njësi të dedikuar (FNSH) të trajnuar sipas standardeve të BE-së për menaxhimin e protestave të dhunshme.

Dallimi mes protestuesve dhe akteve të dhunës: Ish-kryepolici nëvizoi se nuk duhet përgjithësuar protesta e studentëve me veprimet e personave që kryejnë akte dhune, ndërsa dënoi shkatërrimin e bizneseve private.

Vonesat në ndërhyrje: Gazetarja Klodiana Lala ngriti pikëpyetje mbi efikasitetin e policisë, duke sjellë shembuj të vonesave në ndërhyrje pranë bankave apo Katedrales, ku forcat e rendit mbërritën me vonesë pavarësisht afërsisë me ngjarjet.

Përgjegjësia e efektivëve: Nano theksoi se punonjësit që kanë treguar mungesë profesionalizmi apo shpërdorim detyre duhet të mbajnë përgjegjësi ligjore dhe administrative, duke mirëpritur masat e marra për pezullimin e disave prej tyre.