Presidenti amerikan, Donald Trump, ka deklaruar se ekzekutimi i Nidal Malik Hasanit, ish-majorit të ushtrisë amerikane të dënuar për masakrën e vitit 2009 në bazën ushtarake Fort Hood, nuk do të transmetohet drejtpërdrejt.

Përmes një reagimi në rrjetin social Truth Social, Trump e cilësoi Hasanin si “tradhtar” dhe kujtoi se ai vrau 13 persona—përfshirë një ushtare shtatzënë—si dhe plagosi rëndë 32 të tjerë.

Edhe pse Presidenti argumentoi se një transmetim i tillë mund të shërbente si masë parandaluese për të treguar reagimin e SHBA-së ndaj terrorizmit, ai sqaroi se do të respektohet dëshira e shumicës së njerëzve për të mos e parë ekzekutimin në ekran.

Sipas vendimit, Hasani do të ekzekutohet me pushkatim siç është planifikuar, ndërsa dëshmitarë në vendngjarje do të jenë vetëm familjarët e afërt të viktimave që dëshirojnë ta ndjekin procesin.

Në të njëjtin reagim, Trump kritikoi administratën e ish-presidentit Barack Obama për dështimin e inteligjencës së FBI-së, e cila përpara sulmit kishte nënvlerësuar komunikimet me email mes Hasanit dhe klerikut radikal Anwar al-Awlaki.