SHKODËR – Një shpërthim me lëndë plasëse ka tronditur mbrëmjen e sotme qytetin e Shkodrës, ku objekt i sulmit ka qenë banesa e një efektivi të Policisë së Shtetit.

Ngjarja ka ndodhur në zonën e Unazës Perëndimore, pranë banesës së policit Ardian Baçina, ekspert i Kriminalistikës.

Sipas të dhënave paraprake nga terreni, lënda eksplozive ishte vendosur pranë hyrjes së ndërtesës.

Nga shpërthimi nuk raportohet për persona të lënduar, por vetëm për dëme të konsiderueshme materiale në strukturën e banesës dhe ambientet përreth.

Forca të shumta policie dhe grupi hetimor kanë mbërritur në vendngjarje, duke ngritur perimetrin e sigurisë.

Ekspertët po këqyrin zonën dhe po sekuestrojnë pamjet e kamerave të sigurisë për të bërë të mundur identifikimin dhe kapjen e autorëve, si dhe për të sqaruar prapaskenat e këtij sulmi.