MADRID — Kylian Mbappé ka hyrë zyrtarisht në historinë e UEFA Champions League duke u bërë lojtari më i ri që arrin kuotën e 100 paraqitjeve në këtë kompeticion prestigjioz evropian.

Sulmuesi francez i Real Madridit e arriti këtë shifër jubilare në moshën 27-vjeçare (27 vjet e 298 ditë), gjatë përballjes kundër Romës të zhvilluar të mërkurën mbrëma.

Rekordi i mëparshëm mbahej nga Lionel Messi, i cili kishte arritur paraqitjen e tij të 100-të në Ligën e Kampionëve në shtator të vitit 2015, në moshën 28 vjet e 84 ditë, po ashtu në një ndeshje përballë Romës.

Mbappé e kurorëzoi këtë arritje duke shënuar edhe gol gjatë ndeshjes, i cili ishte goli i tij i 72-të në Champions League. Me këtë realizim, ai parakaloi legjendën e Real Madridit, Raúl González, në listën e golashënuesve më të mirë të të gjitha kohërave në këtë veprimtari.

Francezi kishte debutuar në Champions League në shtator të vitit 2016 me fanellën e Monacos, kur ishte vetëm 17 vjeç, ndërsa sezonin e kaluar e mbylli si golashënuesi më i mirë i turneut me 15 gola.