DURRËS — Peshëngritësi shqiptar Samuel Rrasa ka ngjitur Shqipërinë në podiumin e Kampionatit Europian të Peshëngritjes për Të Rinj dhe U-23 që po zhvillohet në Durrës, duke siguruar medaljen e bronztë në stilin e shtytjes për kategorinë deri në 65 kg.

Sportisti kuqeblu realizoi 125 kg në stilin e shkëputjes, ku u rendit në vendin e katërt, ndërsa në stilin e shtytjes ngriti 153 kg, rezultat që i siguroi vendin e tretë dhe medaljen e bronztë. Në dygarësh, Rrasa grumbulloi gjithsej 278 kg, duke e mbyllur garën në vendin e katërt të renditjes së përgjithshme.

Kjo medalje shënon suksesin e parë për kombëtaren shqiptare në këtë kampionat europian, ku vendi ynë përfaqësohet nga nëntë sportistë (gjashtë në kategorinë junior dhe tre në U-23). Garat e kombëtares vijojnë më 16 tetor me Enkeleda Carjan në kategorinë deri në 69 kg (ora 13:00) dhe Antonino Mullisin në kategorinë junior deri në 75 kg (ora 17:00).