TIRANË — Dita e tretë e protestës së të rinjve ka sjellë një masivizim të bojkotit mësimor në të gjithë vendin, duke përfshirë si auditorët universitarë ashtu edhe shkollat e mesme, ndërsa Kuvendi i Shqipërisë ka anuluar seancën e parashikuar plenare.

Në kryeqytet, nxënësit e gjimnazeve kryesore — si “Petro Nini Luarasi”, “Partizani”, “Qemal Stafa” dhe “Çajupi” — i janë bashkuar studentëve në marshimet që po bllokojnë disa nga akset kryesore rrugore.

Revolta është shtrirë me shpejtësi edhe në rrethe:

Elbasan: Studentët kanë bllokuar akset rrugore kryesore, ku pas përplasjeve me forcat e rendit, policia ka nisur shoqërimin e disa të rinjve.

Durrës: Në Universitetin "Aleksandër Moisiu" (UAMD), studentët kanë hyrë në godinat e fakulteteve duke bërë thirrje për bojkot me parullat "Dilni nga klasa" dhe "Poshtë patronazhistët!", përpara se të marshonin drejt sheshit qendror.

Kamëz: Gjimnazistët kanë bojkotuar mësimin dhe kanë bllokuar rrugët me thirrjet "Të gjithë së bashku!".

Ndërkohë, në planin politik, seanca e parashikuar e Kuvendit të Shqipërisë është anuluar zyrtarisht pas mbledhjes së Grupit Parlamentar të Partisë Socialiste, nga ku deputetët e shumicës parlamentare janë larguar nga godina e parlamentit.