TIRANË — Agjencia ndërkombëtare e lajmeve Reuters e ka cilësuar protestën studentore në Tiranë si shpërthimin më të dhunshëm të pakënaqësisë kundër kryeministrit Edi Rama, në një klimë zemërimi në rritje mbi korrupsionin e perceptuar në nivelet e larta të qeverisjes.

Sipas raportimit të Reuters, mijëra studentë vërshuan në rrugët e kryeqytetit duke u vënë flakën një godines qeveritare dhe dy bankave — përfshirë një degë të Raiffeisen Bank pranë Ministrisë së Arsimit — si dhe duke qëlluar me gurë ndaj forcat e rendit. Policia u përgjigj me autobote uji dhe gaz lotsjellës për të shpërndarë turmën, e cila po ashtu dëmtoi fasadat e bizneseve lokale dhe përmbysi kazanët e mbeturinave.

Agjencia e lajmeve vëren se protestat vijnë pas një vere tubimesh paqësore lidhur me projektin e resortit luksoz në jug të Shqipërisë të mbështetur nga dhëndri i ish-presidentit amerikan Donald Trump, Jared Kushner. Organizatorët studentorë theksuan se revolta lidhet me kostot e larta të arsimit të lartë, mungesën e mbështetjes financiare dhe perspektivën e dobët të punësimit, duke e lidhur këtë lëvizje me valën e aktivizmit studentor që po përfshin Evropën.

Reuters citoi njërën prej protestuesve në terren:

“Ky është një revolucion. Jemi lodhur nga protestat paqësore. Nuk do të ndalemi derisa Rama të japë dorëheqjen”

Lidhur me ngjarjet reagoi edhe Zëvendëskryeministrja Albana Koçiu përmes një deklarate:

“Protesta është një e drejtë legjitime, por ajo nuk mund të përdoret si justifikim për dhunë, shkatërrimin e qytetit apo përleshje të shëmtuara në mes të rrugës. U bëj thirrje studentëve dhe çdo qytetari të ndershëm që beson në të drejtën e protestës: Distancohuni nga dhuna dhe vandalizmi!”

Ndërkohë, Policia e Shtetit paralajmëroi përmes një njoftimi se:

“Çdo person që ushtron dhunë, djeg apo shkatërron pronën, ose sulmon punonjësit e Policisë, mban përgjegjësi individuale dhe do të përballet me ligjin, në përputhje me veprat penale të kryera”