Kryeministri Edi Rama ka reaguar sot në mëngjes pas dy ditësh protestash të tensionuara në Tiranë, duke paralajmëruar se të gjithë personat e përfshirë në aktet e dhunës, zjarrvëniet dhe shkatërrimin e pronës publike e private do të përballen me ligjin.

Në reagimin e tij, kreu i qeverisë ka bërë një dallim të qartë mes studentëve që protestojnë për kërkesat e tyre dhe personave që, sipas tij, kanë shfrytëzuar tubimet për të shkaktuar dhunë dhe destabilitet.

“Kjo nuk është dora e studentëve. Studentët janë të mirëpritur dhe për ta ne jemi gati të ulemi, të flasim dhe të diskutojmë për gjërat që kërkojnë zgjidhje”, është shprehur Rama.

Kryeministri ka drejtuar akuza të forta ndaj opozitës, të cilën e bën përgjegjëse për aktet e dhunshme të regjistruara gjatë protestave.

Sipas tij, pas personave të maskuar që kanë sulmuar institucionet qëndrojnë forca politike që synojnë ta kthejnë Shqipërinë pas.

“Këto janë të tjera duar, duar që përpiqen ta ulin poshtë Shqipërinë. Janë duart e një opozite, e cila me maska të verbërish përpara, me zjarr dhe hekur kërkon ta rikthejë Shqipërinë aty ku Shqipëria nuk do të rikthehet kurrë”, ka deklaruar kreu i qeverisë.

Rama e ka lidhur situatën e krijuar edhe me rrugëtimin e Shqipërisë drejt Bashkimit Evropian, duke theksuar se vendi nuk do të lejojë që dhuna të pengojë të ardhmen e tij evropiane.

Ai është ndalur edhe te dëmtimi i zyrës së Kolegjit të Evropës, të cilën e ka cilësuar si simbol të asaj që ka përjetuar Tirana gjatë orëve të fundit.

Pjesa më e fortë e reagimit të kryeministrit lidhet me paralajmërimin për përgjegjësinë ligjore të personave të përfshirë në incidente.

“Kushdo që mendon se ligji është larg, gabon. Përgjegjësia para ligjit është e gjithsecilit dhe kushdo që ka dorë në këtë katrahurë, do të paguajë”, ka paralajmëruar Rama.

Kreu i qeverisë ka theksuar se Shqipëria do të vazhdojë rrugën e integrimit evropian dhe se, sipas tij, përpjekjet për të rikthyer pasigurinë dhe trazirat nuk do të kenë sukses.

“Shqipëria nuk do të kthehet më pas, shqiptarët nuk do jenë kurrë pengje të së shkuarës”, ka deklaruar ai.

Në përfundim, Rama ka përcjellë një mesazh për studentët dhe të rinjtë, duke theksuar se e ardhmja e vendit u përket atyre dhe se qeveria mbetet e gatshme për dialog mbi shqetësimet dhe kërkesat e tyre.

“E ardhmja është e studentëve, e ardhmja është e Shqipërisë dhe e shqiptarëve”, ka përfunduar kryeministri.

Reagimi vjen pas protestave të 13 dhe 14 tetorit, të shoqëruara me përplasje mes protestuesve dhe policisë, zjarrvënie dhe dëmtime të institucioneve shtetërore e bizneseve private. Pretendimet e Ramës për përgjegjësinë politike të opozitës mbeten akuza të tij dhe nuk përbëjnë përfundime të provuara nga hetimet.

Deklarata e plotë e Kryeministrit Edi Rama:

Reagim i Kryeministrit Edi Rama nga godina e djegur e Kolegjit të Europës

Deri dje kjo ishte zyra e kolegjit të Europës, shkollës së Europës së bashkuar që e çelëm në Shqipëri së bashku me udhëheqësit europian të pranishëm këtu Tiranë. 

Sot, kjo është rrënoja e duarve që nuk janë dhe nuk mund të janë kurrë duart e studentëve. Studentët janë e ardhmja. Studentët janë ata që shohin larg dhe që duan te shkojnë më larg dhe me shpejt. Studentet janë gjithnjë te mirëpritur dhe për ta ne jemi gjithnjë gati të ulemi, të flasim, të diskutojmë dhe të gjejmë zgjidhje për gjërat që kërkojnë zgjidhje. 

Këto janë të tjera duar! Këto janë duart që përpiqen ta ulin poshtë Shqipërinë sa herë që Shqipëria përpiqet të shkojë lart. Këto janë duart e një opozite e cila me maska të verbërish përpara, me zjarr dhe me hekur kërkon ta rikthejë Shqipërinë aty ku Shqipëria nuk do te rikthehet kurrë, kërkon ta rikthejë Shqipërine në humnerën nga ku ne te së bashku e nxorëm dhe prej ku po e ngjisim drejt majës historike, drejt ëndrrës së të gjithë shqiptarëve në breza, Bashkimit Europian. 

Qëlloi që kjo zyrë e Kolegjit të Europës, e shkollës së gjeneratës së re të europianëve, e shkollës së studentëve europianë, të jetë sot simboli i gjithçkaje që Tirana dhe Shqipëria dhe shqiptarët ku do ndodhen pa anë dhe po shohin në këto orë të vështira. Janë orë të vështira, por janë orë të cilat do t’i kalojmë të gjithë së bashku sepse Shqipëria do të vazhdojë të ngjitet, sepse Shqipëria do të vazhdojë në rrugën e saj për Europën e të gjithë studentëve të saj, e të gjithë vajzave dhe djemve të saj dhe kurrë më nuk do të bjerë ato duar që e ka kanë kapur për fyti dhe e kanë zhytur thellë e më të thellë opozitën shqiptare, por nuk mundet dot ta kapin për fytin Shqipërinë dhe kushdo që mendon se ligji është larg, gabon. Përgjegjësia para ligjit është e gjithsecilit dhe gjithkush që ka dorë ne këtë katrahurë sigurisht qe paguajë. Do të paguaj sepse Shqipëria nuk do të kthehet më kurrë pas. Shqiptarët kurrë më nuk do të jenë pengje të së shkuarës dhe e kaluara që u rikthye me verbërinë e saj këto orë në qendër të Tiranës, si një fantazmë që përpiqet të bëjë atë që ka bërë gjithnjë sa herë shqiptarët kanë dashur të ngrenë kokën, do të mbetet e kaluar. E ardhmja është e studentëve! E ardhmja është e Shqipërisë dhe shqiptarëve!