Një video e shpërndarë pak më parë nga ministria e Brendshme tregon kreun e saj Ervin Demo sonte në një vizitë spitalore për të parë nga afër policët e lënduar në protestën e sotme.

Ajo që shihet në video është se pavijonët dhe dhomat Spitalore janë ende në gjendje të mjerueshme, larg standardeve të Bashkimit Evropian që presim të futemi së shpejti.

Pamjet tregojnë pajisje të vjetra dhe të dëmtuara, pllaka të shumë kohëve më parë, ndarëse shtretërish modeste, etj.

Demo flet për të lënduarit:

51 punonjës të Policisë së Shtetit janë lënduar gjatë akteve të dhunës së sotme. Disa prej tyre ndodhen aktualisht në Spitalin Ushtarak, ku po marrin kujdesin e nevojshëm mjekësor.

Pas çdo uniforme është një njeri. Një prind, një bir, një bijë, një familjar që ka dalë nga shtëpia për të përmbushur detyrën dhe për të garantuar sigurinë e qytetarëve.

Dhuna ndaj punonjësve të Policisë së Shtetit është e papranueshme dhe nuk mund të justifikohet në asnjë rrethanë. E drejta për të protestuar është e garantuar, por dhuna ndaj atyre që kanë për detyrë të mbrojnë rendin dhe sigurinë nuk është dhe nuk mund të jetë kurrë pjesë e saj.

Mirënjohje dhe respekt për çdo punonjës policie që sot, përballë dhunës dhe rrezikut, qëndroi në krye të detyrës me profesionalizëm, përkushtim dhe përgjegjësi.

Ju uroj shërim sa më të shpejtë të gjithë efektivëve të lënduar! Jemi pranë jush dhe familjeve tuaja.

Pas uniformës është njeriu. Pas detyrës është sakrifica. Dhe kjo sakrificë meriton respektin e të gjithëve.