Pas kaosit të gjithanshëm që përfshiu qendrën e kryeqytetit gjatë ditës së dytë të protestës, Policia e Shtetit ka nisur një valë operacionesh për shoqërimin e personave të përfshirë në akte dhune dhe vandalizmi në zona të ndryshme të Tiranës.

Gjatë orëve të mbrëmjes, veprimet policore u shtrinë përtej bulevardit kryesor, ku efektivët ndërhynë pranë Kryeministrisë për të larguar dhe shoqëruar protestuesit që u rikthyen përballë godinës zyrtare.

Në zonën e “21 Dhjetorit”, policia shoqëroi tre persona pas tensioneve të krijuara nga hedhja e gurëve dhe bllokimi i akseve rrugore. Shoqërime të tjera u kryen edhe në Rrugën e Elbasanit ndaj personave të dyshuar për pjesëmarrje në sulmet ndaj infrastrukturës dhe forcave të rendit.

Forcat e Policisë së Shtetit po vijojnë patrullimet intensive në të gjitha akset kryesore të kryeqytetit për të shpërndarë grumbullimet e mbetura dhe për të rivendosur rendin publik.