TIRANË — Pasi nxënësit e gjimnazit “Partizani” dolën në rrugë, edhe studentët e Universitetit të Mjekësisë i janë bashkuar revoltës duke bojkotuar procesin mësimor.

Studentët e Universitetit të Mjekësisë, UBT-së, Politeknikut, fakultetit të Drejtësisë, etj. kanë nisur marshimin drejt Ministrisë së Arsimit.

Tensione ka pasur edhe në Fakultetin e Shkencave të Natyrës, ndërsa disa protestues kanë thyer derën kryesore dhe janë futur në ambientet e brendshme të fakultetit.

Gjimnazistët e shkollës “Partizani” i janë bashkuar studentëve dhe të rinjve në revoltë.

Gjithashtu, edhe në universitetet e disa rretheve ka nisur bojkotimi i mësimit, në shenjë solidariteti me studentët në Tiranë.

Të rinjtë janë grumbulluar në rrugët kryesore të kryeqytetit dhe, pasi kanë marshuar pranë zonës së “Medresesë”, i janë drejtuar qendrës së Tiranës.

Shkallëzimi i protestave vjen pas përplasjeve të dhunshme të ditës së djeshme, të cilat u mbyllën me 16 persona të arrestuar dhe 49 të tjerë të proceduar nga Policia e Shtetit.