TIRANË — Klevi Metaj, student i Universitetit të Tiranës dhe i biri i korrespondentes së News24 në Gjirokastër, Brikena Metaj, është shndërruar në një nga emrat më të komentuar pas protestës studentore të së martës përpara Ministrisë së Arsimit.

Pamjet e regjistruara gjatë tubimit tregojnë të riun teksa ecte në trotuar në momentin kur është goditur nga një efektiv policie, ngjarje që u pasua nga një përplasje fizike mes tij dhe disa efektivëve të Forcave të Ndërhyrjes së Shpejtë (FNSH) të pajisur me shkopinj gome.

Materialet filmike dhe fotografitë e publikuara më pas shfaqin Metajn e prangosur te kangjellat e Ministrisë së Arsimit, si dhe me shenja të dukshme dhune brenda furgonit të Policisë së Shtetit, pamje këto që u shpërndanë me shpejtësi në rrjetet sociale duke e cilësuar si “Studenti i drejtësisë në kërkim të së drejtës”.

Protesta kombëtare e të rinjve nisi me kërkesa për ndryshimin e gjendjes në sistemin arsimor, luftimin e pabarazisë dhe mungesës së meritokracisë, ndërsa u mbyll me shoqërimin e dhjetëra personave dhe dëmtimin e disa të tjerëve, përfshirë edhe punonjës të medias.