TIRANË — Ministria për Evropën dhe Punët e Jashtme ka dënuar zyrtarisht aktet e vandalizmit të kryera gjatë ditës së djeshme ndaj selisë së Nunciaturës Apostolike në Tiranë, ku mes të tjerash u hoq edhe flamuri i Selisë së Shenjtë.

Përmes një deklarate zyrtare, MEPJ nërmjetëson se respektimi i paprekshmërisë dhe dinjitetit të përfaqësive diplomatike përbën një detyrim themelor ligjor e ndërkombëtar, ndërsa kërkon identifikimin e plotë të përgjegjësve.

Deklarata e plotë e Ministrisë për Evropën dhe Punët e Jashtme:

“Ministria për Evropën dhe Punët e Jashtme dënon aktet e vandalizmit të ushtruara dje tek selia e Nunciaturës Apostolike në Tiranë, përfshirë heqjen e flamurit të Selisë së Shenjtë.

Respektimi i paprekshmërisë dhe dinjitetit të përfaqësive diplomatike është një detyrim themelor, në përputhje me legjislacionin shqiptar dhe të drejtën ndërkombëtare.

E drejta për të protestuar është pjesë e pandashme e një shoqërie demokratike, por ushtrimi i saj duhet të respektojë ligjin dhe të përjashtojë çdo formë dhune apo vandalizmi. Autorët e akteve të paligjshme duhet të identifikohen dhe të përgjigjen përpara ligjit.

Ministria vlerëson reagimin e Policisë së Shtetit dhe shpreh besimin se institucionet kompetente do të zbardhin plotësisht ngjarjen dhe së bashku me institucionet e përfshira, do të garantojë sigurinë dhe paprekshmërinë e të gjitha përfaqësive diplomatike në Shqipëri.”