Protesta e studentëve përpara Ministrisë së Arsimit shihet nga analisti Redi Shehu si një protestë kundër protestës dhe po ashtu si një protestë kundër qeverisjes.

"Ngjan si protestë kundër protestës së vjetër, e cila nuk arriti që për katër muaj të ruajë qëndrueshmërinë e vet, të homogjenizojë përmbajtjen dhe, ajo që është më e rëndësishmja, ta mbajë të pastër nga ndërhyrjet e grupeve politike.", vlerëson Redi Shehu.

Ndërsa veçon: "Është protestë kundër asaj të vjetrës sepse kjo e fundit, pas katër muajsh, u largua diametralisht nga qëllimi për të cilin zanafilloi. Vendi, koha dhe përbërja e saj e tregojnë këtë distancim".

Për Redi Shehun, me iniciativën studentore, protesta e fundit po rikthen bashkë me besimin edhe homogjenitetin e pjesëmarrjen.

"Në formatin e parë e kishte të pamundur të kthehej në lëvizje politike, ndërsa në formatin e tanishëm është më e lidhur, më precize, më e vendosur dhe për pasojë më efektive. Këta janë parametrat e parë që doemos çojnë drejt një platforme politike", vlerëson ai.

Për Shehun, qeverisja aktuale nuk është thjesht një qeverisje e zakonshme e cila rrëzohet lehtë; ajo përfaqëson një sistem kakistokratik, i cili për t’u rrëzuar kërkon kohën dhe pjekurinë e vet.

Por çfarë ndodh më pas? Analisti Redi Shehu thotë se pjekuria e protestës së re do të shihet nëse do të arrijë të ruajë fizionominë e një lëvizjeje studentore autonome, pa u identifikuar me opozitën e vjetër politike".

"Ky kufi bëhet gjithmonë e më i hollë, ndaj edhe pjekuria politike e studentëve duhet të jetë e madhe", përfundon Shehu.