Ministrja e Shëndetësisë, Klodiana Spahiu, u përball me djalin 19 vjeçar nga Librazhdi, Ledion B., i cili mbeti i plagosur mbrëmjen e 13 tetorit në Tiranë nga një dhunë e rëndë policore që shkoi deri në thyerjen e këmbës së të riut.

Spahiu ka vizituar në Spitalin e Traumës 19-vjeçarin, për të parë gjendjen e tij pasi disa punonjës policie i thyen këmbën gjatë dhunës së ushtruar.

Ledioni dëgjohet në videon e mëposhtme duke i thënë ministres se nuk kishte lidhje me protestën. Ai shpjegoi se thjesht ishte duke kaluar në rrugë kur u përball me forca të shumta policore që e futën në mes duke e goditur në mënyrë të papërgjegjshme.

Në lidhje me rastin e të riut, janë pezulluar nga detyra katër efektivë dhe shefi i Komisariatit të Policisë Nr. 1, ndërsa kanë nisur hetimet nga Agjencia e Mbikëqyrjes Policore (AMP) dhe Prokuroria.

Në lidhje me videon e publikuar në media, ku shfaqet 19-vjeçari L. B., i dëmtuar në këmbë, teksa shoqërohet nga punonjësit e Policisë pranë Parlamentit "për t’u dërguar në spital për ndihmë mjekësore", Policia e Shtetit tha se ka nisur verifikimet për të sqaruar rrethanat e rastit dhe mënyrën e trajtimit të tij nga punonjësit e Policisë.

Pavarësisht verifikimeve të nisura, Drejtori i Përgjithshëm i Policisë së Shtetit ka urdhëruar pezullimin e menjëhershëm nga detyra të katër punonjësve të Policisë, si dhe të shefit të Rendit në Komisariatin e Policisë Nr. 1, nënkomisar F. K.

Drejtoria e Standardeve Profesionale në Policinë e Shtetit ka nisur hetimin disiplinor ndaj tyre.

Gjithashtu, me urdhër të Drejtorit të Përgjithshëm, është ngritur një grup i posaçëm, nën drejtimin e Drejtorisë së Standardeve Profesionale, për të verifikuar dhe analizuar të gjitha veprimet e punonjësve të Policisë, nga fillimi deri në përfundim të tubimit, si dhe zbatimin e procedurave standarde të punës. Çdo punonjës që ka shkelur procedurat apo ka tejkaluar kompetencat do të mbajë përgjegjësi.

Ndërkohë, Agjencia e Mbikëqyrjes Policore, në bashkëpunim me Prokurorinë, ka nisur hetimet për rastin.