Policia pezullon 5 efektivë pas videos së 19-vjeçarit të dëmtuar, AMP dhe Prokuroria nisin hetimet

Policia e Shtetit ka reaguar pas publikimit në media të videos ku shfaqet 19-vjeçari L. B., i dëmtuar në këmbë, teksa shoqërohet nga efektivët pranë Parlamentit për t’u dërguar në spital.

Sipas njoftimit zyrtar, menjëherë pas publikimit të pamjeve janë nisur verifikimet për të sqaruar rrethanat e ngjarjes dhe mënyrën se si i riu është trajtuar nga punonjësit e Policisë.

Drejtori i Përgjithshëm i Policisë së Shtetit ka urdhëruar pezullimin e menjëhershëm nga detyra të katër punonjësve të Policisë, si dhe të shefit të Rendit në Komisariatin Nr. 1, nënkomisar F. K.

Ndaj tyre, Drejtoria e Standardeve Profesionale ka nisur hetim disiplinor.

Policia njofton gjithashtu se është ngritur një grup i posaçëm që do të analizojë të gjitha veprimet e efektivëve që nga nisja deri në përfundim të tubimit, përfshirë respektimin e procedurave standarde të punës.

Sipas Policisë së Shtetit, çdo efektiv që rezulton se ka shkelur procedurat ose ka tejkaluar kompetencat do të mbajë përgjegjësi.

Paralelisht, Agjencia e Mbikëqyrjes Policore, në bashkëpunim me Prokurorinë, ka nisur hetimet për rastin.

Në reagimin e saj, Policia iu referua edhe episodeve të dhunshme gjatë protestës në kryeqytet, duke deklaruar se dëmtimi, shkatërrimi dhe djegia e pronës nuk mund të konsiderohen pjesë e ushtrimit paqësor të së drejtës për protestë.

Policia u ka bërë thirrje personave të maskuar dhe atyre që kryejnë akte dhune të ndalin veprimet, ndërsa qytetarëve u kërkon të distancohen nga episodet e dhunshme për të shmangur rrezikimin e sigurisë së tyre.

Reagim i Policisë së Shtetit

Në lidhje me videon e publikuar në media, ku shfaqet 19-vjeçari L. B., i dëmtuar në këmbë, teksa shoqërohet nga punonjësit e Policisë pranë Parlamentit për t’u dërguar në spital për ndihmë mjekësore, Policia e Shtetit ka nisur menjëherë verifikimet për të sqaruar rrethanat e rastit dhe mënyrën e trajtimit të tij nga punonjësit e Policisë.

Pavarësisht verifikimeve të nisura, Drejtori i Përgjithshëm i Policisë së Shtetit ka urdhëruar pezullimin e menjëhershëm nga detyra të katër punonjësve të Policisë, si dhe të shefit të Rendit në Komisariatin e Policisë Nr. 1, nënkomisar F. K. Drejtoria e Standardeve Profesionale në Policinë e Shtetit ka nisur hetimin disiplinor ndaj tyre.

Gjithashtu, me urdhër të Drejtorit të Përgjithshëm, është ngritur një grup i posaçëm, nën drejtimin e Drejtorisë së Standardeve Profesionale, për të verifikuar dhe analizuar të gjitha veprimet e punonjësve të Policisë, nga fillimi deri në përfundim të tubimit, si dhe zbatimin e procedurave standarde të punës. Çdo punonjës që ka shkelur procedurat apo ka tejkaluar kompetencat do të mbajë përgjegjësi.

Ndërkohë, Agjencia e Mbikëqyrjes Policore, në bashkëpunim me Prokurorinë, ka nisur hetimet për rastin.

Policia e Shtetit thekson se aktet e dhunshme të shfaqura prej orësh në kryeqytet, përfshirë dëmtimin, shkatërrimin dhe djegien e pronës, nuk kanë asnjë lidhje me ushtrimin paqësor të së drejtës për protestë dhe nuk mund të justifikohen në asnjë rrethanë.

Policia e Shtetit u bën thirrje personave të maskuar dhe atyre që kryejnë akte dhune e shkatërrimi t’i ndalin menjëherë, pasi do të përballen me forcën e ligjit.

Gjithashtu, Policia e Shtetit u kërkon qytetarëve të distancohen nga personat e dhunshëm, për të garantuar sigurinë e tyre.