Pamjet që shikoni tregojnë forca të shumta policore që pak çaste më parë shoqëruan disa të rinj duke përdorur dhunë ndaj tyre.

Sakaq raportohet se disa të rinj kanë mbetur të lënduar në shkallë të ndryshme. Disa prej tyre mësohet se janë dërguar në urgjencën e QSUT si dhe tek spitali i Traumës.

Sakaq policia njoftoi më herët se ka arrestuar 23 të rinj, por ky informacion ishte i pasdrekës sepse shumë shoqërime dhe arrestime janë kryer në orët në vijim dhe po vazhdojnë edhe momentalisht.

Video noa/lsa

Më herët sot ora 19 Ministria e Shëndetësisë tha se në Qendrën Spitalore Universitare “Nënë Tereza” (QSUT) janë paraqitur tre protestues me shqetësime shëndetësore pas ekspozimit ndaj gazit. Pas konsultës me mjekët, dy prej tyre janë larguar nga spitali, ndërsa personi i tretë vijon ekzaminimet nga stafi i urgjencës.

Në Spitalin Universitar të Traumës kanë marrë shërbim mjekësor edhe dy përfaqësuese të medias, të cilat, pas ekzaminimeve dhe konsultave përkatëse, janë larguar me këshillën e mjekut, në gjendje shëndetësore jashtë rrezikut për jetën.

Gjithashtu, gjashtë efektivë të Policisë, të raportuar me dëmtime nga mjete të forta, kryesisht në gjymtyrët e sipërme dhe të poshtme, kanë marrë kujdesin e nevojshëm mjekësor dhe janë larguar nga spitali jashtë rrezikut për jetën, me këshillën e mjekut.

Për ndihmë mjekësore janë paraqitur edhe dy kalimtarë. Njëri prej tyre është shtruar në spital, ku do të vijojë të qëndrojë nën kujdesin e stafit mjekësor, ndërsa tjetri po mbahet në monitorim nga mjekët.

Ministria e Shëndetësisë dhe Mirëqenies Sociale dhe strukturat shëndetësore mbeten në gatishmëri për të garantuar ofrimin në kohë të kujdesit mjekësor për çdo person që paraqet nevojë.