TIRANË, 13 Tetor 2026 — Ministri i Brendshëm, Ervin Demo, ka publikuar një deklaratë të dytë zyrtare lidhur me ngjarjet e dhunshme në kryeqytet, duke zgjeruar reagimin e tij fillestar dhe duke paralajmëruar verifikim të paanshëm për të gjitha pretendimet lidhur me tejkalimin e forcës nga efektivët e Policisë së Shtetit.

Ndryshe nga qëndrimi i parë ku fokusohej te dënimi i dhunës ndaj policisë, Demo shprehu shqetësimin për të gjithë të lënduarit gjatë përplasjeve, duke përfshirë studentët, qytetarët, gazetarët dhe punonjësit e policisë. Ai nënvizoi se ruajtja e standardeve evropiane kërkon llogaridhënie institucionale dhe proporcionalitet në ndërhyrje.

“Çdo veprim i Policisë duhet të jetë i ligjshëm, i nevojshëm dhe proporcional. Organet kompetente do të shqyrtojnë paanshmërisht çdo pretendim për përdorim të paligjshëm apo joproporcional të forcës, pa i paraprirë asnjë përfundimi hetimor. Çdo pamje dhe dëshmi që ndihmon në zbardhjen e çdo detaji të mundshëm duhet të ruhet dhe të verifikohet,” deklaroi Demo.

Kreu i Ministrisë së Brendshme ritaksoi se e drejta për të protestuar mbetet e garantuar, por dënoi sulmet ndaj insitucioneve dhe pronës publike. Ai u kërkoi strukturave të Policisë së Shtetit të marrin masa për uljen e tensioneve, ndërsa garantoi se përgjegjësitë ligjore si për dhunuesit, ashtu edhe për tejkalimet e mundshme administrative do të përcaktohen mbi bazën e provave individuale.